Monday , August 19 2019
Home / த.மா.கா செய்திகள் / தமிழ் மொழியில் நீட் தேர்வு எழுதிய மாணவ, மாணவிகளுக்கு கருணை மதிப்பெண்கள் வழங்கிட நடவடிக்கை: வாசன் வலியுறுத்தல்
Fresa XPress

தமிழ் மொழியில் நீட் தேர்வு எழுதிய மாணவ, மாணவிகளுக்கு கருணை மதிப்பெண்கள் வழங்கிட நடவடிக்கை: வாசன் வலியுறுத்தல்

உயர்நீதிமன்ற மதுரைக்கிளை பிறப்பித்துள்ள உத்தரவின் படி தமிழ் மொழியில் நீட் தேர்வு எழுதிய மாணவ, மாணவிகளுக்கு கருணை மதிப்பெண்கள் வழங்கிட மத்திய, மாநில அரசுகள் உரிய நடவடிக்கை எடுக்க வேண்டும் என, தமாகா தலைவர் ஜி.கே.வாசன் வலியுறுத்தியுள்ளார்.

இதுதொடர்பாக ஜி.கே.வாசன் இன்று (சனிக்கிழமை) வெளியிட்ட அறிக்கையில், “உயர்நீதிமன்ற மதுரைக்கிளை பிறப்பித்துள்ள உத்தரவின் படி தமிழ் மொழியில் நீட் தேர்வு எழுதிய மாணவ, மாணவிகளுக்கு கருணை மதிப்பெண்கள் வழங்கிடவும், அதன் அடிப்படையில் இன்னும் கூடுதலான தமிழக மாணவர்கள் மருத்துவக் கல்லூரியில் சேர்வதற்கும் உரிய நடவடிக்கையை எடுக்க வேண்டியது மத்திய, மாநில அரசுகளின் கடமையாகும்.

 இந்தியா முழுவதும் கடந்த மாதம் 6 ஆம் தேதி நடைபெற்ற நீட் தேர்வில் 13 லட்சம் மாணவர்கள் பங்கேற்றனர். இதில் தமிழகத்தில் மட்டும் ஒரு லட்சத்து 7 ஆயிரத்து 288 மாணவர்கள் தேர்வு எழுதினர்.

தமிழ் மொழியில் நீட் தேர்வு எழுதிய மாணவர்களுக்காக தயாரிக்கப்பட்ட வினாத்தாள்களில் 49 கேள்விகள் தவறாக மொழி பெயர்க்கப்பட்டிருந்தன. இதனால் பாதிக்கப்பட்டது தமிழக மாணவ, மாணவிகள் தான். இதனை சரிசெய்ய வேண்டும், நியாயம் கிடைக்க வேண்டும் என்ற நல்ல நோக்கத்தில் இது சம்பந்தமாக உயர் நீதிமன்ற மதுரைக்கிளையில் மார்க்சிஸ்ட் கம்யூனிஸ்ட் கட்சியின் மூத்த தலைவரும், மாநிலங்களவை உறுப்பினருமான டி.கே. ரங்கராஜன் மனு தாக்கல் செய்தார்.

இதுகுறித்து நடைபெற்ற விசாரணையின் தீர்ப்பில் உயர் நீதிமன்ற மதுரைக்கிளை தமிழில் நீட் தேர்வு எழுதிய மாணவர்களுக்கு கருணை மதிப்பெண்ணாக 196 மதிப்பெண்கள் வழங்க வேண்டும் என்று சிபிஎஸ்இ-க்கு உத்தரவிட்டது. இது நியாயமாக போடப்பட்ட மனுவுக்கு கிடைத்த நியாயமான தீர்ப்பாகும். இந்த உத்தரவை நிறைவேற்ற வேண்டியது மத்திய அரசின் கடமை.

அது மட்டுமல்ல இந்த உத்தரவுக்கேற்ப தமிழில் நீட் தேர்வு எழுதிய மாணவர்களுக்கு கருணை மதிப்பெண் கிடைத்து அவர்களும் மருத்துவப் படிப்பில் சேர்வதற்கு வாய்ப்பு ஏற்பட வேண்டும். அதே நேரத்தில் ஏற்கெனவே தமிழ் மொழியில் நீட் தேர்வு எழுதி தேர்ச்சி பெற்று மருத்துவக் கல்லூரிகளில் சேர்வதற்கு இடம் கிடைத்த மாணவ, மாணவிகளும் பாதிக்கப்படாமல் இருப்பதை உறுதி செய்து கொள்ள வேண்டியது தமிழக அரசின் கடமை.

எனவே மத்திய, மாநில அரசுகள் ஒருங்கிணைந்து முடிவு எடுத்து தமிழ் மொழியில் நீட் தேர்வு எழுதிய மாணவ, மாணவிகள் மருத்துவப் படிப்பில் சேர்வதற்கு நீதிமன்ற உத்தரவை செயல்படுத்திட வேண்டும். அதன் மூலம் நீட் தேர்வு எழுதிய தமிழக மாணவ, மாணவிகளில் ஏற்கனவே மருத்துவப் படிப்பில் சேர்வதற்கு வாய்ப்பு பெற்றுள்ள நிலையில் இன்னும் கூடுதலான மாணவ, மாணவிகளுக்கும் மருத்துவப் படிப்பில் சேர்வதற்கு வாய்ப்புகள் கிடைக்கும்.

எனவே கல்விக்கு இன்னும் அதிக முக்கியத்துவம் கொடுத்து – வினாத்தாளாக இருந்தாலும், விடைத்திருத்துவதாக இருந்தாலும், குழப்பங்களுக்கு இடம் கொடுக்காமல், முறைகேடுகள் நடைபெறாமல் இருப்பதற்கு மத்திய, மாநில அரசுகள் தொடர் நடவடிக்கை எடுத்து மாணவ, மாணவிகளின் கல்விக்கு புத்துயிர் ஊட்ட வேண்டும்” என ஜி.கே.வாசன் வலியுறுத்தியுள்ளார்.

Fresa BPO

About musthafa

Check Also

gk-vasan3

அர்ஜூனா விருதுக்கு தேர்வாகியுள்ள டேபிள் டென்னிஸ் வீரர் சத்யனுக்கு ஜி.கே.வாசன் வாழ்த்து

அர்ஜூனா விருதுக்கு தேர்வாகியுள்ள டேபிள் டென்னிஸ் வீரர் சத்யனுக்கு   , தமாகா தலைவர் ஜி.கே.வாசன்   வாழ்த்து  ஜி கே …